لوجين بتوهان : بخصوص عصام

وليد بصدمه : نعم

في الصباح كان وليد في غرفه لوجين يسألها على ما كانت تقصده

لوجين بتوتر: انا قولت عصام وانا نايمه

وليد : ايوه احكي بقي في اي

لوجين بخوف : مفيش

امسك وليد يد لوجين ليطمئنها وقال: قوليلي علشان لو فيه حاجه اقدر أساعدك مش احنا متفقين منخبيش حاجه على بعض

لوجين بخوف : ايوه بس المرادي غير

وليد بقلق : غير ازاي أحكي

لوجين : قابلني وقالي انه بيحبني وانه عايز يتجوزني قعدت اقوله لا ابعد عني مرضاش حتى كدبت وقولتله ان في حد في حياتي برضو قالي اديني فرصه وعايز يجي يتقدم بس انا معرفهوش

وليد : طيب ابعدي عنه دلوقتي و تستني لحد ما اتاكد من حبه اتفقنا

لوجين : ازاي

وليد بمرح : يا ستي احنا رجاله زي بعض بس اسمعي كلامي ماشي

لوجين براحه : ماشي

_________________________

في شقه توفيق ظلت نوران في سعاده شديده بسبب قبول عمها لأسر

_فلاش باك_

نوران بتذمر : انا مش هتجوز غير اسر يا عمي

توفيق وهو يقلب في الجريده : يبقي مش هتتجوزي خالص يا حبيبه عمك

نوران : طيب قولي عمل اي انت عارفني بتحكم بعقلي اكتر من قلبي

توفيق بنفاذ صبر : قولتلك بلاش واسمعي كلامي متفرهدنيش يا نوران

امسكت نوران بذراعه وقالت : ارجوك ارجوك قولي.

توفيق بحزن مخفي : خلاص هقولك بس افتكري اني قولتلك بلاش

نوران ببسمه : حاضر فهمني بقي لي اسيبه علشان اهلي هو اسر زعلك

توفيق بكذب : ايوه

نوران : يااه طيب دا انا اجيبه هنا يعتذرلك ويبوس رأسك كمان

توفيق بدون قصد : هو انتي مصدقه انه بيحبك

نوران  : يعني اي

توفيق :  انا بسألك عادي

نوران بكسوف : ايوه مصدقاه

توفيق بتفكير : طيب انا عايز اقابله ولو حسيته بيحبك فعلا هوافق اتفقنا

نوران بفرح : ماشي اتفقنا

توفيق : خليه يجي بكره لو فاضي الساعه 5

نوران بفرحه : حاضر

_باك_

واتصلت بأسر عده مرات ولكنه لم يرود وبعد لحظات اعلن هاتفها اتصالًا من اسر

اسر : السلام عليكم

نوران بفرحه : وعليكم السلام

اسر : خير يا نينو

نوران بفرحه : قولت لعمي و قال انه عايز يقابلك بكره الساعه 5 لو فاضي

أسر باستغراب : اقابله

نوران بفرحه : ايوه مش انت كنت عايز تتقدملي هو بقي قالي انه عايز يقابلك قبل ما تيجي تتقدم

أسر بحزن : اه فهمت طيب يا نينو ممكن نتكلم في الموضوع دا بعدين

نوران : يعني اي مش فاهمه

اسر بتردد : انا هتقدملك والله بس ممكن تصبري شويه

نوران باستغراب : واصبر لي انت حالتك الماديه كويسه و يعني مفيش حاجه تمنعك انك تتقدم دلوقتي وكمان انت الي قولتلي انك عايز تتقدم

أسر : انا في حياتي مشاكل دلوقتي

نوران باستغراب : مشاكل طيب لي محكتليش عنها مش قولنا اننا هنتشارك همنا ومشاكلنا

كان أسر يريد أن يحكي لنوران ولكن ماذا يحكي انه متورط في قضيه او مشكله لا يعرفها حتى : ارجوكي متضغطيش عليا

نوران بكسره تحاول ان تخفيها : لا لا مش هضغط عليك ربنا يسهلك الحال ومشاكلك تتحل

اسر : يا رب... بس انتي ممكن تديني رقم عمك وانا هكلمه وافهمه

نوران بجمود : لا لا ملهوش لزوم انا هفهمه وانت حاول تحل مشاكلك.. باي

ثم انهارت من البكاء كل ما شعرت به انه يريد ان يتركها او يتهرب فهي لا تعرف الحقيقه ولكنها قررت أن تعامله مثل دكتور الماده الخاصه بيها ولا تتحدث معه مره اخرى بطريقه غير رسميه

سمع توفيق صوت بكائها فحزن كثيرا وقرر ان يدخل لها

توفيق بحزن : مالك يا حبيبتي

ارتمت نوران في احضانه و أكملت بكائها : علشان كدا سألتني انتي مصدقه انه بيحبك

توفيق بحزن : يا حبيبتي دا كان سؤال عادي

نوران ببكاء : عرفني انت لي مش حابه

توفيق بتصميم: لا 

نوران ببكاء : هو اتهرب مني دلوقتي بحجه انه عنده مشاكل وانا خلاص هشيله من دماغي لأنك مربتنيش اني اندلق على حد وانا عايزه اعرف قصه عيلته

توفيق وهو يربت على شعرها : مفيش قصه ولا حاجه انا قولتلك سيبيه علشان اهلك كان قصدي عليا علشان مكنتش موافق بيه

نوران بعدم اقتناع : بجد

توفيق : ايوه بجد وامسحي دموعك كدا مفيش حد في الدنيا يستاهل دموعك تنزل ثم اكمل بضحك : وقومي بسرعه قبل ما ليلي تيجي و تعيط معاكي انتي كمان

نوران بضحك : اه عيوطه اوي... بحبك اوي يا عمي

توفيق : انا اكتر يا حبيبه عمك

_______________________

في فيلا الشافي كان اسر في مكتبه حزين على ما يفعله لو بيده الموضوع كان امسك بعصام وتعامل معه لكنه لا يعرف ماذا فعل فـفي صغر اسر كان يلهوا و يعرف فتيات كثيرات وكانت من ضمنهم جميله الي كانت حبه الأول قاطع تذكر ذكرياته دخول وليد للمكتب

وليد بجمود : اسر مرات ابوك تبقي خاله عصام

اسر بصدمه : نعم

وليد : عرفت لما شوفت الفيديو

اسر بغضب : وهي فين دلوقتي

وليد : في الاوضه فوق بس عرفت اننا عارفين كل وحاجه و... بدء يحكي لأسر كل ما يعرفه

اسر : وانت لي محكتليش

وليد : كنت بتأكد الاول من المعلومات

اسر وهو يشعر بالأمل : طيب نخلي دلال تكلمه وتقوله يجي و ساعتها نعرف منه كل حاجه

وليد :لا فيه طريقه تانيه ودي اضمن

اسر : اي هي

وليد بذكاء : هو بيحب لوجين ممكن لوجين تقوله اننا قولنالها كل حاجه و انها عايزه تعرف كل حاجه احنا منعرفهاش

اسر بغضب : وانت عايز تخاطر بأختك

وليد : عصام عمره ما يأذي لوجين فا دي مش مخاطره وكمان هنبقي معاها

اسر : انت مخك خلاص ضرب، ابعد لوجين عن كل الليله دي

وليد : هيا دي الطريقه الوحيده حتى عمر فكر فيها

اسر : وعمر كمان عارف حب عصام لاختي اللهم صلي على النبي

وليد بضحكه عفويه : هو علشان حبوب حس من نبره صوت عصام انه فعلا بيحبها

اسر : نبره اه

وليد : طيب والله هو قالي كدا

اسر : سيبني افكر في الموضوع واحسبه وهبقي اقولك

وليد : اشطا يا كبير

وذهب وليد يطمئن على لوجين وعلى والده

اسر وهو يكلم نفسه : اه يا كلاون كنت عايز تقهرني على اختي حبتها ثم بدء يضحك

_________________________

في الصعيد في بيت البارودي

نيره : يا هشام انا المفروض ارجع النهارده القاهره

هشام : قولي لجدك

نيره بخيبه امل : هو انا لسه هقوله

هشام باستفزاز : شوفتي بقي

نيره : يا هشام روح قوله هو بيحبك

هشام : يخربيت القر دا

نيره  : روح قوله يا اتش وانا هبطل قر اتفقنا

هشام وهو يقف متجه ناحيه مكتب جده: من واجب الاغنياء العطف علي الفقراء برضو

نيره بضحك : اي دا دي كلمه ريناد ايوه بقي

استغرب هشام ولكنه ابتسم وقال لها : طبعا مش خطبيتشي

نيره بمرح : يسهلوا يا عم... روح بقي وانا هجهز شنطتي اهوه

__________________

في المكتب

عبد العزيز : تعالي يابني

هشام بإحترام: النهارده المفروض نيره تسافر القاهره هو حضرتك نسيت

عبد العزيز : لا منستش يابني بس هيا لسه مغيرتش رأيها

هشام : هناك حياتها يا جدي واصحابها برضو

عبد العزيز بتنفس : واحنا عيلتها يا هشام

هشام : عارف بس واحده واحده وكمان هيا فضلها سنه وتخلص لما تخلص ان شاء الله هتيجي هنا ومش هتمشي

عبد العزيز باقتناع : ان شاء الله بس هتروح ازاي من غير ابوها وامها..

هشام : هيا حكتلي انها بتقعد في سكن يعني حتي لو عمي ومرات عمي هناك هيا بتقعد في سكن

عبد العزيز : طيب على بركه الله

هشام بابتسامه : شكرا يا جدي

وخرج من المكتب وصعد على غرفه نيره وطرق الباب

نيره : ادخل

هشام بمرح : إفراج يا نيره

نيره : ايوه بقي ميجبها إلا اتشها

هشام باستغراب : اتشها طب والله اخلي جدي يغير رايه

نيره : لا لا هو فيه زي هشام و طيبه هشام برضو

هشام بضحك : ايوه كدا.. يالا جهزي الشنطه
_______________________

في شقه محمد كان يتحدث حسام مع عمر علي الهاتف

حسام ببرود : بترن عليا لي

عمر بضحكه خفيفه : بطمن عليك الله

حسام : لا متتطمنش عليا

عمر : مكنش بأيدي اني اخبي متحملنيش ذنب حاجه انا معملتهاش

حسام : لا عملتها لما خبيت عني مرض ابويا يا عمر

عمر : علشان هو طلب مني كدا وهو كان بالنسبالي زي ابويا

حسام بعصبيه : هو لو ابوك كنت مسمعتش كلامه وكنت عالجته برضو

عمر : الله يعلم اني حاولت اخليه يتعالج وهو رفض

حسام بعصبيه : وهو مات اهوه وملحقنهوش

عمر : هو كان عايز يموت في بيته في وسطكوا

حسام : عمر اقفل علشان متعصبش عليك ونرجع نزعل من بعض

عمر : لا زعق علشان نتصافي هنفضل كدا لحد امتي

ثم سمع عمر صوت بكاء سهيله فأدار حسام وجهه ووجد ان سهيله كانت تسمع كل حديثهم

حسام بصدمه : انت بتعملي اي هنا..

سهيله ببكاء : ازاي مقاليش

حسام : مقالكيش اي

سهيله ببكاء : عن مرض بابا هو ازاي كدا

حسام : هو مين يا حبيبتي انا بتكلم مع واحد صاحبي

سهيله ببكاء  : لا انا عارفه ان دا عمر

واخذت التليفون من يد اخوها ووضعته على أذنها : الو

عمر بتردد : الو

ازداد بكاء سهيله : لي مقولتليش

عمر بحزن : هو طلب مني كدا مكنش ينفع مسمعش كلامه

سهيله وهيا تمسح دموعها مثل الاطفال : انا مصدقاك وعارفه انك كنت معتبره ابوك وانك مكنتش هتستخسر فيه حاجه

عمر : ايوه والله مكنت هرفضله طلب حتى

سهيله :ربنا يرحمه... ماما كانت قالتلي بس مكنتش اعرف انك كمان اعرف

حسام : يعني مش زعلانه منه

سهيله : لا علشان عارفه انه صادق

حسام بهزار ليفك الموقف : خلاص يا استاذ عمر عفونا عنك كلنا

عمر بفرحه : الحمد لله يا استاذ حسام

حسام : روحي بقي بعيد عايزه اكلمه شويه

سهيله ببسمه: حاضر هروح اساعد ماما بقي

_________________________

عند لوجين كانت تستعد للذهاب لخطوبه صديقتها حيث كانت ترتدي فستان سواريه لون السماء و طرحه نفس اللون وكانت في غايه الجمال والانوثه

وليد بمعاكسه : اش اش اي القمر دا كله

لوجين بضحك : اختشي يا واد بتكسف

وليد بضحك : يواد يمكسوف انت.... الخطوبه فين بقى

لوجين : في قاعه.....

وليد : مش بعيده حبتين عليكي

لوجين : ما البركه فيك بقي يا دود هتوصلني

وليد بتمثيل : اه ضهري ياني لا لا ضهرني وجعني

لوجين : اه يا بكاش خلاص هاخد أسوره ولا الحوجه ليك

وليد بنعاس : ايوه خدي أسوره علشان عايز انام

لوجين : طيب

_______________________

في الاسفل جهز أسر السياره و ركبت لوجين السياره وانطلقوا لمكان القاعه

أسر بحب : شكلك حلو اوي النهارده

لوجين : بجد حبيبي انت

أسر : ايوه هو انا اختي اي حد ولا اي

لوجين بضحك : لا لا كدا هتغر

أسر : صحيح انا لاحظت كدا ان فيه عربيه دايما بتقف قدام الفيلا

لوجين بقلق : عربيه ممكن تكون بتاعه الناس الي جمبنا

أسر ببسمه : انتي قلقانه لي احنا بنتكلم سوا

لوجين بخوف : هو وليد قالك

اسر بهدوء : قالي اي

لوجين : قالك على عصام

اسر : عصام انا عارفه اصلا كان صديق او معرفه قديمه الي جديد عليا هو حبه ثم قام بغمزه

لوجين بابتسامه : اه فهمت.. هو برضو قالي انه يقربلي معرفه قديمه مش مقاليش معرفه قديمه اي..

اسر : مشاكل بينا حصلت بعدتنا عن بعض ويعني يعتبر كرهتنا بعض

لوجين : انا اصلا مش بحبه وكمان بحاول ابعده عني بس هو الي دايما بلاقيه موجود صدفه او ساعات بيتعمد كدا

أسر : عارف يا حبيبتي وانا واثق من تربيتنا ليكي... هو انتي لي مش بتحكيلي كدا ونقعد نحكي زي ما بتعملي مع وليد

لوجين بكسوف : بحس انك مش فاضيلي وانك دايما  مهموم وكمان بحسك مش هتفهمني لانك أكبر مني ب 7 سنين

اسر : لو مش فاضي افضالك و انا مش دايما مهموم انا بس بحب افكر كتير وافكر في كل حاجه وحكايه السن دي مش مهم بالنسبالي وكمان ما انا فهمت لما حكيتيلي او لما وليد حكالي

لوجين : خلاص من النهارده هنتجمع احنا التلاته كدا في اوضه واي احداث جديده نحكيها سوا

اسر ببسمه : كدا اتفقنا... بس ممكن اطلب طلب

لوجين : ابعد عن عصام صح

اسر : كنت هقول متصدقيش كلامه غير لما مشاكلنا تتحل ولما اتأكد انه بيحبك اتفقنا

لوجين : اتفقنا ثم اكملت بكسوف : هو انا ينفع أسألك سؤال

اسر : طبعا

لوجين بكسوف : هو عصام عنده كام سنه

اسر بتذكر : 28 سنه

لوجين : اه العمر كله

ابتسم اسر لانه أحس انها تحسب فرق السنين بينهم ولكن تحول الاحساس الي يقين عندما وضعت يدها على خمس صوابع  وبعد دقائق من هذا الحديث وصلت لوجين الي الخطوبه

أسر بابتسامه : شكله خطوبه جميله

لوجين : ايوه هي اصلا العروسه قمر قمر قمر

قاطع حديثهم دخول احدي صديقات لوجين

كنزي : اي يا لوجين كل دا

لوجين ببسمه : معلش اتاخرت

كنزي : عادي ولا يهمك ثم نكزتها في كتفها حتي تعرفها على أسر

لوجين : اه دا أسر اخويا الكبير

كنزي بلمعه عين : اخوكي.. اهلا انا كنزي

اسر ببسمه : اهلا انا أسر... يالا يا لوجين ندخل

و ظلت الخطوبه مستمره حتى وقت متأخر فذهب أسر يأخد قهوه من مشاريب البوفيه فوجد عصام مع اصدقائه ومتجه ناحيه البوفيه فابتسم أسر وقال : اهلا يا عصام

التفت عصام لمن يناديه وعندما وجده أسر قال : اي دا اسر الشافي بنفسه هنا

أسر : شوفت بقي

عصام : والله وليك وحشه يا جدع

كان سيتحدث ولكن اوقفه مجئ لوجين : انا عايزه عصير مانجا

أسر بحنان : طيب يا حبيبتي تعالي اقعدي هنا

لوجين بعفويه : شوفت البت كنزي

اسر باستغراب : اه مالها

لوجين بضحك : حبتك

اسر بضحك ولقد نسي وقوف عصام نهائي و اندمج مع لوجين : يا نهر ابيض اي الحب السريع دا

لوجين بضحك : حب من اول نظره نقوله لا

ظل عصام ينظر للوجين كأنه يحاول اشباع عينيه منها ولكن بوجودها مع أسر يجعله يستشيط غضبا فقال بصوت غاضب : حمدي هاتلى طلبي المعتاد

حمدي : حاضر يا عصام

هنا استدارت لوجين نحو صوته وبمجرد ما رأت عينه الغاضبه على أخيها انزعجت بشده وقررت ان تجعله يعتذر لاسر فهو اصغر منه ولا يصح ان ينظر له هكذا

لوجين بغضب : استاذ عصام

أسر : لوجين انتي بتعملي اي

لوجين باحترام : بعد اذنك يا أسر.. عصام

عصام : نعم

لوجين بجمود : اعتذر لأسر

استغرب كلا من اسر وعصام و تحدثوا في وقت واحد : نعم

لوجين : اعتذر لاسر علشان انت بصتله بطريقه مش حلوه وهو اكبر منك

عصام : وانتي متعرفيش حاجه يبقي متتكلميش

لوجين : اعرف او لا بس الي اعرفه انك لازم تحترم أسر

أسر بتدخل  : لوجين يالا نمشي

لوجين بعند : مش قبل ما يعتذر

أسر بنفاذ صبر  : لوجين

عصام بتحذير : متكلمهاش كدا وخليها تقول الي حباه ملكش دعوه

اسر بسخريه : يعني هتعتذرلي

عصام :..............

_________________________

البارت خلص ❤️

متنسوش الڨوت و الكومنت يا احلى ناس  ❤️❤️