#الــــورقه_الــــرابحــــه
#الجــــزء_الثالـــث
#بقـــلمــي_امـــل_احـــمــد_سلــوم

*╚══════ღღ══════

دخلت بدور لعند ابوها وعلى وجهها ابتسامة حب واول ماوصلت لعندو تناولت ايدو وباستها

بدرو ـ صباح الخير ابي؟.. كيفك !

عصام ـ انا هلأ صرت ب احسن حال بعد ماشفتك يا قرة عين أبوكي..وينك اليوم مافي اعذار وبدك تتغدي معي .

ضحكت بدور بسعادة:

ـ أنا تحت امرك ابي, بس بيرضيك  أولادي يموتو من الجوع !...
عصام : يعني بخلص من همام بيطلعولي امير ويوسف صحيح جوزك ايمت راجع من السفر

بدور : هالمره احتمال يتأخر لانه المشروع بدو وقت ليخلص

عصام : الله يردو بالسلامه

بدور : يارب

عصام : معناها هلأ بتتصلي بيوسف وامير ليجوا مع باجس ونتغدا سوا

بدور : امرك ابي

عصام بحزن : ياريت سمعت كلمة امرك من اخوكي جاسم الا بس شاطر يراددني بالكلام وماعم يفكر بمصلحة العيله

ترددت بدور  وبعدا  حكت بتلعثم:

ـ إممممم.. بصراحه انا .. .

عصام : شبك بنتي لي متردده .. ما عهدتكِ هيك يابي…  هاتي احكيلي مين اتصل عليكي  وطلب منكِ تتوسطي عندي ؟.. جاسم ولا ياسمين؟..

جاوبت بدور بسرعة:

بصراحه ياسمين ابي.. هيه شبه منهارة , وماتنسى انها حامل وكل هالانفعالات والتوتر مو لصالحها .. ياريت نأجل الموضوع لفترة عالقليله لحتى تولد على خير و...

قاطعها بعجل :

ـ وشو يا بدور ؟.. يعني بس تولد رح تغير  رأيها؟.. مابظن.. وبعدين عدة شمس خلصت من اسبوعين وخايف تطلع م̷ـــِْن القصر

بدور بصدمة:ـ تطلع م̷ـــِْن القصر؟!!!.. لوين بدها تروح ؟..

عصام : ـ لدمشق خالتها عايشه  هونيك..و أنا بعرف أنها شمس  واعيه وعلى دراية تامة بتقاليدنا بس مابضمن الظروف واحتمال تقرر تترك. القصر  وماتقبل تعيش ببيت عايش فيه ابو زوجها المتوفي وكمان ابن أخوه الشاب
بدور : فعلا معك حق
عصام :  انتي بتعرفي منيح  أني مستحيل اسمحلها  تعيش ببيت مرتضى لوحدها والوقت عم يداهمنا لك بنتي وانا مو فاضي لدلع النسوان واللي حكيته بدو يتنفذ ان وافقت ياسمين او لأ… .
بدور : بترجاك ابي لاتقسى عليها اكيد مو سهله على اي مره تقبل ببساطه بضره تشاركها بيتها وزوجها
عصام : اتركيلي موضوع ياسمين انا بعرف كيف اتعامل معها

*╚══════ღღ══════╝

وبالشركه…  توجه امير لمكتب باجس وهو ماسك ملف وباين عليه الضيق
امير : انسه دعاء باجس بيك بمكتبه
دعاء : اي يابيك بس بعتزر منك مافيي اسمحلك تفوت لعندو

رفع حاجبه بتعجب وقرب منها وحط ايديه عالمكتب وحنى جسمه بهدوء واردف بجديه

امير : انتي متأكده انك مارح تسمحيلي فوت
دعاء بخوف : بـ بعتزر منك… بـ بس هي اوامر باجس بيك
امير : اوامر باجس بيك بتطبقيها عباقي الموظفين ياحلوه مو على امير بيك ولا لتكوني نسيانه اني هون متلي متله واني حفيد عصام بيك
دعاء : اكيد مانسيت بس… .
امير : مخصوم منك تلات ايام
دعاء :

ابتسم ابتسامه هزليه وحمل الملف وفتل حاله بكل غرور ودخل لمكتب باجس

كان باجس قاعد على كرسيه وغامر راسه بين ايديه

امير : شو شريك قال مانعني فوت لعندك
وقعد وحط اجر على اجر
امير : سيكرتيره غبيه خصمتلا تلات ايام لتتعلم كيف تحاكيني

رفع راسه بهدوء واطلع فيه بتعجب

باجس : خصمت على مين تلات ايام
امير بغرور : على هي السيكرتيره الغبيه…  من كل عقلها عم تمنعني فوت لمكتبك

بكل هدوء ضغط عالزر بحد مكتبه
باجس : انسه دعاء تفضلي لعندي ازا سمحتي
دعاء : امرك استاز

تلفت عليه امير ب استغراب
امير : خلص مافي داعي تبهدلها انا سمعتها كلمتين

مارد عليه وبقي هادي وشابك ايديه ببعض لحتى اندق الباب وفاتت منه دعاء

دعاء : نعم باجس بيك
باجس : انا مو قلتلك مابدي اي حدا يفوت لعندي
اطلعت دعاء ناح امير وحكت بخوف  : اي صح وانا حاولت احكي هالشي لامير بيك هالشي بس

ضرب ايدو عالمكتب بقوه وصرخ

باجس : مافي بسس انا عطيتك امر بتنفذيه بدون اي استثنائيات مفهوم
دعاء : حـ حاضر استاز
باجس : تفضلي ع مكتبك
دعاء : امرك

فتلت حالها لتطلع واستوقفها صوت باجس

انسه دعاء

تلفتت بسرعه وهي عم تبلع ريقها…  نعم استاز
باجس : مخصوم منك اسبوعين ..وازا اتكرر هالشي اعتبري نفسك مفصوله من الشركه…  وهلأ شرفي ع مكتبك
دعاء : امرك يابيك

طلعت وسكرت الباب وراها بهدوء

باجس : امير تاني مره وقت اعطي الموظفين امر لاتفكر تتجاوزني مفهوم
امير : لا مو مفهوم انت نسيان اني اكبر منك واني هون متلي متلك
باجس : اكيد مو نسيان بس الشغل شي وقرابتنا شي
امير : انت بس بدك تثبت انك اعلا مني وانك المفضل عند جدي وكلامك بيمشي عالكل
باجس بهدوء : شو كنت بدك
كز ع اسنانه بغيض وحكا بغضب…  سلامتك باجس مابدي شي بالازن يا………  مدير…

طلع من المكتب وضرب الباب وراه بقوه اما باجس حنى جسمه عالكرسي ورجع يفكر برواد

باجس : ياترا وين رحتي يارواد…  معقول كلام الجيران مزبوط وانك سافرتي !!!

*╚══════ღღ══════╝

وعند رواد… .

علي : لك مية اهلا وسهلا نورتو لبنان امي وبنت اختي
ام علي : منوره بوجودك حبيبي
علي : نويتو تستقرو هون
ام علي : تقريبا ابني بدي ابعد رواد عن محيط عيلة الشامي عالقليله ليشتد عودها
علي : عملتي منيح امي…  رواد يادوب عمرها 15 سنه ومابدي ياها تربى عالكره والحقد… . بعدها عن هالعليه اللعينه احسن حل…  ووجه كلامه لرواد… . ماهيك خالو
رواد : اكيد خالو ومتل ماحكت تيته لكل شي اوآن…… .. بالازن بدي اخد شور وارتاح شوي

طلعت من الصاله وقرب علي م̷ـــِْن امه وهمس

علي : شبها رواد صاير شي امي
ام علي : رح خبرك بكل شي صار ابني

*╚══════ღღ══════╝

وصل باجس برفقة يوسف عالقصر وتوجهوا عالصاله الرئيسيه

باجس : مسا الخير…  كيفك جدي .. كيفك عمه
الجد : مسا النور
بدور : اهلين عمه شو وينو امير
يوسف : طلع من الشركه وماحكا لوين رايح
الجد : شو هاد !!!!
باجس : لاتشغل بالك جدي اكيد بيكون عندو شغل مستعجل برات الشركه واضطر يطلع بدون مايخبرنا
الجد بشك : متأكد مافي مشاكل بالشغل باجس
باجس : اطمن جدي كلشي تمام
الجد : اي منيح… .. وانت يوسف
يوسف : نعم جدي
الجد : خبرتني امك انك حابب تسافر ل امريكا لتكمل دراستك
يوسف : بصراحه اي جدي بدي اخد الماجستير طبعا ازا سمحتلي
الجد : اي طبعا ابني وليش لحتى ما اسمح هاد مستقبلك والشهاده سلاح

حس باجس بضيق بداخله…  جدو ماسمحله يكمل دراسته والزمه يستلم ادارة الشركات برغم عمرو الصغير…  ماكان قادر يقرر اي قرار شخصي وكان جدو دائما يلزمه بتنفيذ اوامره بدون نقاش

قام يوسف وباس ايد جدو : بتشكرك جدي
الجد : ولو ابني .. نسيان انك ابن الغاليه
بدور : الله مايحرمنا منك ابي
الجد : ولامنك ياعيون ابوكي…  يالله قوموا غسلوا ايديكم لنتغدا

يوسف وباجس : امرك جدي

بدور : بالازن رايحه اشوف البنات بالمطبخ

توجهت بدور عالمطبخ ووقفت وهي عم تطلع حواليها وبعدا مسكت تلفونها وطلبت رقم واستنت الرد

امير : اهلين امي
بدور : وينك انت ليش ماجيت مع اخوك
امير : امي انا كتير مشغول لغير مره
بدور : بس يا امي جدك…
امير : جدي بيقدر يمشي باجس كيفو بس مابيقدر يمشيني
بدور : ولد هاد جدك
امير : اي جدي اللي حارمنا من ابسط حقوقنا وعاطي كلشي للسيد باجس حاج امي مابدي اجي وانتهى انا عندي شغل اهم من الغدا 
بدور : خلص متل مابدك سلام
امير : الله معك

حط التلفون عالطاوله وشبك ايديه ببعضن
امير : ايه انسه دعاء شو بتحبي تشربي 😈

*╚══════ღღ══════╝

علي : هيك لكن نبذها الكلب عصام
ام علي : برضاي عليك ابني ماتفتح هالموضوع مع رواد
علي : اكيد لا امي ومن بكرا رح روح عالنفوذ وسجل رواد على اسمي
ام علي : بيزبط
علي : بدها تزبط وازا مازبطت في الف طريقه لاغير اسمها واسم عيلتها اللي مو معترفه فيها ومن اليوم بتنسي وحده اسمها رواد…  رواد من هاللحظه اسمها رودينا

*╚══════ღღ══════╝

كان الصمت هو سيد الموقف ببيت جاسم
كان هادي طول الوقت وناطر  من ياسمين أي ردة فعل لينفذ طلب أو بالأحرى أمر أبوه
وكانت هي بدورها هاديه اكتر منه بتبتهل بصمت أنه محاولاتها تجيها بنتيجة..بس الشي اللي كان مرعبها انه توسلها لبدور  لتتدخل وتوقف هالزواج مااعطاها اي مبشر بالاخص انها بدور بدت غير مقتنعة بالتدخل فهي قبل كل شيء بنت ابوها  وبتعرف حتمية هالزواج والغرض منه.. لكن بعد توسلات وافقت بدور على التدخل لخوفها على صحة ياسمين وحملها لانه احتمال كبير يكون  الصبي المُنتظر..
مرت الايام وياسمين  عايشه على الأمل بانتظار نتيجة محاولتها لعل وعسا تكون لصالحها .

لكن هالأمل مات بمهده وقت لمحت ياسمين من شباك غرفتها سيارة عمها الفارهة صفت قدام بيتها وهو بينزل منها وبيتحرك بتثاقل ب اتجاه بابها..
حطت ايدها على قلبها وحست أن محاولة بدور بائت بالفشل الأكيد.

توجهت بسرعه ب اتجاه غرفة الضيوف لترحب بعمها بعد مانده عليها زوجها واول ماوصلت انحنت ب احترام وباست ايدو

ياسمين : اهلا وسهلا عمي حلت البركة على بيتي بتشريفك اله

ربت الجد  على راسها وسحبها من ايدها برفق لتقعد حدو

الجد ـ بارك الله فيكِي بنتي .. تعي اقعدي بحدي
ياسمين : حاضر عمي
الجد :  ايه بنتي شو طابخه اليوم عالغدا حابب اتغدا معك ومع البنات

ردت ياسمين بلهفة:

ياسمين : تكرم عينك عمي تكه وبيكون الغدا جاهز

ضحك  العجوز وهو ماسك ايدها ليمنعها تقوم من مكانها

الجد ـ اقعدي اقعدي حابب احكي معك واشبع منك ..

و التفت ناح ابنه:

الجد ـ وأنت جاسم مابدك تنادي  حفيداتي ليسلمو على جدهن؟..

جاسم بتلعثم: ـ اه ايه . طبعا.. أكيد أبي هلأ بناديلن

طلع جاسم من الصالون بالرغم من التضرع الواضح بعيون زوجته  ليبقى معها وما يتركها وحدها  بمواجهة كبير العيله

التفت عليها الجد وحكا بتمهل

ياسمين بنتي . أنتِي بتعرفي مكانتكِ عندي ومعزتكِ بقلبي, أنتِ مل قمر ابنتي بالضبط

ياسمين ـ اكيد عمي.. أنا..

قاطعها الجد : ـ وما دامك بتعرفي هالشي ليش بتبعتيلي وسايط بينا  !

زاد توترها ومالقيت كلام ترد عليه ليتابع هو كلامه

الجد ـ بعرف انه جاسم وضحلكِ السبب اللي من أجله طلبت منه يتزوج شمس, وبعرف أنها معارضتكِ شي طبيعي ومافيكي تتحكمي بقلبك لكني انا  بدي منك تفكري بعقلكِ شوي. وتحطي مصلحة العيلة قدام عيونكِ
ياسمين :………… ..
الجد : بدك اتضيع أملاككِ أنتِي وبناتك.. بدك  تتشتت أملاكنا ونتفاجئ بشركاء الله أعلم بهويتهم؟..
ياسمين :…… .
الجد : أنا مدرك كتير منيح انه  طلبي صعب على أي مره مو بس عليكي لكنكِ مو أي مره…  أنا  ربيتكِ وكبرتِي تحت عيوني, وبعرف مدى قوتكِ وثقتكِ بنفسكِ اللي مارح تهتز بسبب جيزه بتم مشان مصلحة العيلة أولاً وأخيراً..

ساد صمت رهيب بعد ماخلص الجد  كلامه, وياسمين بعدها ساكته مو عارفه بشو تجاوبه !! او شو  هو التصرف السليم؟..

حست بغصه خانقه بقلبها وماقدرت تسيطر عدقاته المضطربه بضلوعها

ياسمين بقلبها : معقول اجا عمي  ليحط مصير العيله بين ايدي ؟...ياترا بشو عم تفكر ياعصام بيك  بدك تسمع موافقتي على هالمهزلة؟.. شو بدك مني ؟.. وليش  هالعزاب؟..إزا بدك تجوز ابنك لشمس جوزو .. بس مافي داعي لهي التمثيلية اللي عملتا لتخليني اضطر وافق وتحطني تحت الامر الواقع وتروح بعدا تتظاهر بأنه كلشي تم بموافقتي وإرادتي… . لك لحتى تشبيهك الي ببنتك بدور وانه معزتي متل  معزتها مو صحيح..  معقول لو كان همام بدو يتجوز وحده تانيه على بدور رح توافق ... مستحيل لك والله بتدفنه وهو حي لو فكر مجرد تفكير بهالشي.. طيب ليش انا ليش ااااخ ياربي شو ساوي بحالي 💔.

قاطع الجد عصام سريان أفكارها:

الجد : صدقيني بنتي لو كانت بدور اللي  بإيدها حل المشكلة لكانت وافقت بدون تفكير لانها بتعرف انه هالشي لمصلحة العيله وماكانت سمحتلي اروح لعندها لاقنعها …  بس مع هيك انا عازرك ولهيك جيت بنفسي لعندك

بلشت ياسمين  تحس بالآم عم تهاجم كل خلية بجسمها وحاولت ترد على عمها لكنها ماقدرت تنطق اي حرف…  حست السانها انعقد وتفكيرها انشل… .  زاحت وجهها عنه لتخفي دموعها اللي نزلت  لتُغرق وجهها وهي بتحاول توصول لقرار صائب أو خاطيء.. أي قرار

وقفت وهي حاسه حالها بعالم تاني وكأنها شايفه كابوس بمنامها ومتمنيه تصحى منه وفجأه حست بالمكان عم يدور فيها  ببطئ وبعدا زاد احساسها  بالدوخه مع ازدياد دقات قلبها  بلشت تحس بآلام رهيبة بقاع  ظهرها ليتسرب الفزع لقلبها وتحاول تلتقط أنفاسها بدون جدوى..

تحركت بدون وعي عم تحاول تمسك أي شي ثابت لانها حاسه انه العالم كله بيدور  وهي عم بتدور معه.. وبتدور.. ليختفي ويتلاشى ببطئ , للحظه فكرت  أنها بتحلم أو بتهذي.. لكن اللي  أكدلها واقعية الشي اللي عم بيصير  هو السائل الدافي يلي بلش  ينساب ببطئ بين اجريها لينبأها بضياع حلمها وفرصتها بإنجاب الصبي...

*╚══════ღღ══════

رحلة سريعة  للمشفى لمحاولة إنقاذ ياسمين وطفلها.. حركة سريعة من الأطباء وطاقم التمريض..واصوات عم تخترق ادان جاسم ..
.. الحالة خطيرة.. محتاجين توقيعك للتدخل الجراحي السريع.. كلمة عم تتردد بكترة.. تسمم حمل.. تسمم حمل.. الوضع مابيسمح بانقاذ الجنين.. طلع الدكتور بسرعه بدو موافقته ليعملا عمليه واي محاوله بتلزم  بسبيل إنقاذ ياسمين..

كل  هالأحداث كانت عم تمر قدام عيون جاسم وكأنها شريط سينمائي . بقي يتأمل غرفة العمليات اللي اختفى فيها الدكتور  بها من حوالي !! .. من حوالي !! .. ماعم يعرف من ايمت !!.. لكنه بيشعر بخوف رهيب  والوقت ماعم يمر.. وفجأة انفُتح باب غرفة العمليات وطلع الدكتور وملامحه متجمدة
جاسم : طمني دكتور كيف وضعها
الدكتور : العمليه تمت بنجاح بس بعدها ماتعدت مرحلة الخطر

تردد جاسم بالسؤال عن ابنه وانعقد لسانه ليلاقي والده بحدو  اللي مابيعرف ايمت وصل عم يسأل الدكتور:

عصام ـ والطفل دكتور ؟..

نكس الدكتور  راسه :ـ آسف...حاولنا ننقذ الجنين لكنه  مات و ...
جاسم : وشو دكتور مرتي فيها احكي
الدكتور ـ برغم انه قدرنا انطالع الجنين بسرعة لكن النزيف استمر وماقدرنا نوقفه بشكل نهائي لهيك كان لابد من استئصال الرحم ……

استئصال الرحم.. استئصال الرحم.. استئصال الرحم!!.

هالجملة بقيت تتردد بذهن جاسم آلاف المرات... وهو عم يحاول استجماع شتات نفسه.. استند عالحيط   وهو بيرمق  بنظرات كلها لوم …  كان بيتمنى بهديك اللحظه لو انه كان بيملك الشجاعه ليوقف بوجهه ويرفض موضوع الزواج من البداية..

كان باجس واقف بحد عمه وانتبه على نظراته اللائمة  عم يوجهها ناح جدو وأيقن أنه عمه جايم بحالة صدمة وانهيار  وممكن يتفوه بكلام   جارح أو حتى مدمر لصحة الجد الهشة, تحرك بسرعه  وحط ايدو علـّۓ كتفه ليخفف عنه :

باجس ـ عمي لازم تكون قوي و تتماسك… . اكيد الخاله ياسمين رح  تحتاجك لما  تفيق…  لو سمحت ارتاح وأنا رح أتولى كل  الأمور لا تشغل بالك

اطلع  جاسم بباجس بعدم فهم  وسأله:ـ أي أمور ؟..

باجس بلعثمه ـ عمي حضرتك بتعرف أن الطفل انولد بعد الشهر السادس لهيك لازم  ...

سكت باجس وما عرف كيف يكمل جملته اللي استوعبها عمه وكمل عنه

جاسم ـ  ..  لازم يندفن ماهيك 💔
باجس :… ..
جاسم : روح عمي ادفنه بمدافن العيله… 
باجس : حاضر عمي… . يالله يوسف خلينا نمشي
يوسف : يالله

تحرك باجس ويوسف بسرعة من قدام جاسم واستوقفهم صوت جدهم
الجد : باجس .
باجس ـ نعم  جدي.
سأل الجد بتردد وهو بيطلع بطرف عينه ناح جاسم
الجد : ـ الدكتور خبرك  بنوع المولود؟..
باجس : ـ جدي.. مافي داعي لهاد السؤال
الجد بصرامه ،،، باااااجس

اطلع باجس ناح   عمه بأسف وبقي ساكت لينطق بداله يوسف
يوسف : ـ  كان صبي ياجدي صبي .

طلعوا الشباب  بسرعه وبقي الجد واقف مكانه بصدمه
قرب منه جاسم وعيونه بيفيض منها لشرار وحكا بجمود قاتل:

جاسم : ـ أبي إنا  مارح أتزوج شمس لو فرغت براسي كل الاسلحه يلي بالكون…… .

*╚══════ღღ══════╝

بعد عدة أسابيع........

فاتت بدور عالقصر  بهدوء لتصادف قدامها باجس اللي كان بيجهز حاله ليطلع ..

باجس : اهلين عمه يسعد صباحك

بدور ـ  صباح الخيرات ياروحي طمني كيف صار جدك أبي هلأ !!
رد عليها بأسى: صحياً منيح…  لكنه مدمر نفسياً حتى بعد ما اجى عمي جاسم واعتزر منه بس هالشي ماحسن نفسيته ابدا بالعكس انتكس اكتر  وكأنه بيحمل نفسه زنب الشي اللي صار للخاله ياسمين ومو قادر  يسامح نفسه لدرجة أنه مو قادر يرجع يفاتح عمي مرة تانيه  بموضوع الزواج.

حطت ايدها  على كتفه وهي بترمقه بوحده من  نظراتها المتفحصة واللي بتخليها قريبه كتير من نطرات ابوها

بدور ـ طيب حبيبي لاتشغل بالك…   عمتك بدور وصلت و رح لاقي  حل لكل المشاكل.

تركته لتتوجه لغرفة ابوها وهي راسمه على وجهها نظرة عجيبة بترجم كل شي عم يدور بعقلها من مخطط رهيب لحل مشكلة العيلة وأملاكها,
  هالخطة اللي اول ماسمعها الجد جن جنونه ونفض راسه بالرفض

الجد : هالشي مستحيل مستحيل ..
بدور : مافي الا هالحل لننقذ اسم العيله ابي
الجد :  •اللّـہ̣̥ مارح ينسانا بس اني اوافق على هيك جنان مستحيل
بدور : بس يا ابي
الجد : انتهى الموضوع بدور خلص

سكتت بدور وهي بتفكر بحل تقدر من خلاله تقنع ابوها بخطتها وبهاللحظه لمحت شمس نازله عالدرج وحامله شنتتها

بدور : شو هاد .. ليش حامله شنتايتك !! لوين رايحه
شمس بحزن مصطنع : مافي شي بيستدعي ابقى هون بدور واعتقد انتي وعمي بتفهموا بالاصول والعادات
انبسطت بدور بسرها واطلعت ب ابوها
بدور : لكن نويتي تتركي القصر
شمس : ايه وبدي ازن عمي ليسمحلي اطلع

شد الجد عقبضته بقهر ونطق بشفايف مرتجفه….  انتي مارح تروحي لمكان شمس
شمس : العفو منك عمي بس بصفتي شو ابقى هون
الجد : رح تتزوجي باجس
شمس : شووو 😲

*╚══════ღღ══════╝

#يــــتـــبـــع

(◕‿◕✿)